इभेन्ट म्यानेजमेन्ट एसोसियसन अफ नेपाल (ईमान) कोशी प्रदेशले कर्मा लाईभ इन कन्सर्ट तथा कुटुम्ब सांगीतिक कार्यक्रम आयोजना गर्न लागेको छ। यो कार्यक्रम आदिवासी रंगशाला, कमल-५, झापामा महाशिवरात्रि (२०८१ फागुन १४ गते, बुधबार) का दिन हुने भएको छ।

कार्यक्रममा नेपाली संगीत क्षेत्रका दुई चर्चित ब्याण्ड— कर्मा ब्याण्ड र कुटुम्ब ब्याण्ड—को मुख्य प्रस्तुति रहनेछ। कर्मा ब्याण्ड रक तथा लोक पप शैलीमा चर्चित छ भने कुटुम्बले नेपाली लोक बाजाहरुको संरक्षण गर्दै फ्युजन धुन प्रस्तुत गर्दै आएको छ।

RAWA Hills Town Property

कार्यक्रमको मुख्य उद्देश्य

यस सांगीतिक कार्यक्रममार्फत कमल गाउँपालिका र यसको स्थानीय पहिचानलाई राष्ट्रिय तथा अन्तर्राष्ट्रिय स्तरमा फैलाउने लक्ष्य राखिएको छ। साथै, सामाजिक उत्तरदायित्व अन्तर्गत:

• आर्थिक स्थिति कमजोर भएका २० जना बालबालिकालाई पूर्ण छात्रवृत्ति प्रदान गरिनेछ।
• मंगलमय मा.वि., कमल-५ मा अध्ययनरत ३०-३५ जना अपांग बालबालिकालाई आवश्यक लत्ताकपडा, स्कुल ब्याग तथा शैक्षिक सामग्री वितरण गरिनेछ।
• कार्यक्रमबाट संकलित कोष संघका सदस्यहरुको हकहितका लागि कोष खडा गर्न प्रयोग गरिनेछ।
• झापा लगायतका क्षेत्रमा सांगीतिक बजारको विस्तार गर्न सहयोग पुग्ने विश्वास आयोजक संस्थाले राखेको छ।

कार्यक्रम व्यवस्थापन र सहकार्य

कार्यक्रमलाई सफल बनाउन ए यस क्यु संस्थाले आयोजकसँग सहकार्य गरिरहेको छ। यस संस्थाले कर्मा ब्याण्ड तथा कुटुम्ब ब्याण्डको व्यवस्थापन तथा नेपालभित्र र बाहिर हुने सांगीतिक कार्यक्रमहरुको व्यवस्थापन गर्दै आएको छ।

कलाकार र प्रस्तुति

• कर्मा ब्याण्ड: तीन दशकभन्दा बढी समयदेखि नेपाली संगीत क्षेत्रमा योगदान दिँदै आएको चर्चित ब्याण्ड हो। यसको लोकप्रिय गीतहरुमा हुक्का मेरो, को हौ तिमी, मायालु किन हो आदि समावेश छन्।
• कुटुम्ब ब्याण्ड: नेपाली लोक बाजाहरुको संरक्षण गर्दै फ्युजन संगीत प्रस्तुत गर्ने चर्चित ब्याण्ड हो, जसले दुई दशकभन्दा बढी समयदेखि सांगीतिक योगदान दिँदै आएको छ।
• कार्यक्रम होस्ट: चर्चित मिडियाकर्मी तथा कलाकार सुरज सिंह ठकुरी।

कार्यक्रम विवरण

• मिति: २०८१ फागुन १४ गते, बुधबार (महाशिवरात्रि)
• स्थान: आदिवासी रंगशाला, कमल-५, पाडाजुङ्गी, झापा
• समय:
  • दिउँसो ३:०० बजे प्रवेश खुल्ला
  • साँझ ५:०० बजे कार्यक्रम सुरु
• टिकट शुल्क:
  • रु ७७७/- (Fan Pit)
  • रु ५५५/- (Normal)

यस कार्यक्रमलाई १०,००० भन्दा बढी दर्शक उपस्थित हुने अपेक्षा गरिएको छ। सांगीतिक उत्सवसँगै सामाजिक सेवाको उद्देश्य बोकेको यो कार्यक्रम कमल गाउँपालिकाका लागि महत्वपूर्ण हुने विश्वास आयोजकले लिएको छ।