– इन्द्र प्रसाद ओली (मौलिक जरोकिलो पार्टी, प्रदेश नं १ अध्यक्ष )

आज पनि नेपालको राजनीतिमा त्यस्तै समस्या छ जुन २०४७ सालको संविधान लागु भएपछी देखिएको थियो । पात्र उही, प्रवृति उही । भ्रष्टाचार र अनियमितता डङ्गुर यथावत छ । राजनीतिक स्थायित्व दिने भन्दै निर्माण गरिएको २०७२ सालको संविधानपछि बनेको बहुमत प्राप्त सरकार समेत आपसी गुट, उपगुटले गर्दा नराम्रोसंग पछारिन पुगेको छ ।

कोरोना संक्रमणको महाव्याधीको पहिलो लहरमा गर्नुपर्ने काम नगरेपछि आज हजारौं नेपालीले अनाहकमा ज्यान गुमाउन पुगेका छन् । तर सत्तावृत्तमा रहेका दलहरूको अकर्मन्यता र अदुरदर्शीताको शिकार आज नेपाली जनता बन्न पुगेका छन् । विकास र समृद्धिको कुरै छोडौँ जनताले ज्यान बचाउन समेत धौधौ पर्ने अवस्था आइसकेको छ।

RAWA Hills Town Property

वि. सं. २००७ सालदेखि निरन्तर एक जमात नेता भनौंदाहरू सत्ताको वरिपरि झिंगा भन्के झैं भन्किरहेका छन् । मुलुक तन्नम बनाउन यिनै पात्रहरूको मुख्य भूमिका भए पनि आम सर्वसाधारण र कार्यकर्ता पछि लाग्न छोडेका छैनन् । नेता भनौंदाहरू सुधार्न सकिने सम्भावना छैन । अब सुध्रिने भनेको सर्वसाधारण नै हो । दिग्भ्रमित भएका कार्यकर्ता नै हुन् ।

अब प्रश्न गर्न थाल्नुस् । आफ्नो मत दिएर स्थापित गरेका सर्वसाधारण र कार्यकर्ताले आफ्नो आस्था भएको पार्टीका नेतालाई सोध्न थाल्नुस् । सत्ताधारी, प्रतिपक्षी वा वैकल्पिक भनेर खोलिएका दलका नेतालाई निम्न लिखित प्रश्न सोध्नुस् । यदि चित्तबुझ्दो जवाफ आएन भने अब तटस्थ बस्नुस्। सधैं कुनै न कुनै पार्टीको पछि लाग्नै पर्छ भन्ने छैन । तपाईंको तटस्थता पार्टीका नेताहरूलाई सोंच्न बाध्य बनाउँछ । सुध्रिन बाध्य बनाउँछ ।

प्रश्नहरू :

(१) तपाईंको पार्टीको दर्शन के हो ?
(२) तपाईंको पार्टीको वाद के हो ?
(३) तपाईंको पार्टीको सिद्धान्त के हो ?
(४) तपाईंको पार्टीको सिद्धान्तको जरो ( उत्पत्ति ) कहाँ हो ?
(५) तपाईंको पार्टीको किलो ( निर्णय गर्ने शक्ति ) कहाँ हो ?
(६) समाज विकासको सिद्धान्त के हो ?
(७) तपाईंको पार्टी धर्मसापेक्ष कि धर्मनिरपेक्ष हो ?
(८) राजसंस्थाको बारेमा तपाईंको पार्टीको धारणा के हो ?
(९) तपाईंको पार्टीको सङ्घीयताको सम्बन्धमा कस्तो धारणा छ ?
(१०) तपाईंको पार्टीको मौलिक धर्म संस्कृति, परम्परा ,रितिथिति, चाडपर्वको विषयमा धारण के हो?
(११) तपाईंको पार्टीले नेपालको भौतिक, मानसिक र आध्यात्मिक विकासका लागि प्राथमिकतामा राखेका कुराहरु केके हुन् ?
(१२) तपाईंको पार्टीको शिक्षानीति कस्तो हुने ?
(१३) तपाईंको पार्टीको कृषिनीति कस्तो हुने ?
(१४) उद्योग-धन्दा, पर्यटन, रोजगारी सम्बन्धी धारणा कस्तो छ ?
(१५) सूचनाको हक अधिकार एवम् सञ्चार नीति कस्तो हुने ?
(१६) शासकिय स्वरुप कस्तो हुने ?
(१७) युवा, वयस्क , प्रौढलाई रोजगारी दिन सक्ने योजना र सत्तामा नपुग्दा पनि लागु गर्न सकिने योजना बताउनु होस ? तपाईंको पार्टीको विकासको मौलिक ढाँचा के हो ?
(१८) तपाईंको पार्टीको आदर्श पुरुष वा सिद्धान्तकार को हुन र यो कुन परिवेशमा बनाइएको हो ?
(२०) प्रशासनको ढाँचा कस्तो हुने ?
(२१) व्यवस्थापिका , कार्यपालिका न्यायपालिकाको हाल कमजोरी पक्ष के हो र कसरी चुस्त बनाउनु हुन्छ ?
(२२) तपाईंको पार्टी सञ्चालन गर्न आर्थिक व्यवस्थापन कसरी गर्नु भएको छ /पैसा कहाँवाट आउँछ ? हालसम्म कुनै पनि विदेशी दातृ निकायबाट सहयोग लिएको छ कि छैन ?
(२३) सनातन हिन्दु राष्ट्र ( हिन्दू, बौद्ध, किरात , जैन, बोन , शिख प्रकृति पुजक आदि) पक्ष कि विपक्ष हो ?
(२४) परराष्ट्र नीति कस्तो हुने ?
(२५) नेपालको सिमा भुगोल रक्षाको नीति के छ ?
(२६) एमसिसी को पक्ष कि बिपक्ष धारणा के छ ?
(२७) नागरिक र राष्ट्रिय सुरक्षा सम्बन्धी तपाईंको नीति कस्तो हो ?
(२८) आदिवासी, जनजाति, उत्पीडित, शिल्पीसमुदाय आदिका बारेमा कस्तो योजना छ ?
(२९) स्वास्थ्यनीति, आयुर्वेदिक , होमियोपेथिक , एलोपेथिकमा छुट्टाछुटै नीति के छ ?
(३०) १ वर्ष देखि ५ वर्षका बालबालिकालाई सुरक्षा नीति कस्तो हुने र नेपाललाई बालमैत्री बनाउन कस्तो योजना उपयोगी वा आवश्यक छ ?
(३१) वर्तमान नेपाल लागु-औषध जोखिममा छ । लागु-औषध नियन्त्रण गर्न यहाँको पार्टीको योजना कस्तो छ ? यस विषयमा हाल सम्म कहीँ कतै कुनै कार्यको थालनी गरेको छ वा छैन ?
(३२) नेपालका सांसदहरु गाँजा खेती गर्नुपर्छ भन्दै छ्न् यहाँको पार्टीको नेपालमा गाँजाखेती गर्नु पर्छ वा पर्दैन भन्ने स्पष्ट धारणा के छ ?
(३३) नेपालका कुन कुन क्षेत्र बिग्रिएका छ्न ? के केमा कसरी सुधार गर्ने योजना छ ?
(३५) नेपालको मौलिकता, विशेषता, गौरव, विरासत र नेपालको अस्मिता जोगाउन यहाँको पार्टीले के अनुसन्धान गरेको छ ? नेपालको ५ अस्मिता के के हुन ?
(३६) नागरिकतानीति सम्बन्धी स्पष्ट धारणा के हो ?
(३७) तपाईंको पार्टीको धर्म र विज्ञान सम्बन्धी दृष्टिकोण के छ ?
(३८) तपाईंको पार्टीको नेपाललाई विश्वको केन्द्र बनाउने सम्बन्धमा के के योजनाहरु र दृष्टिकोणहरु छन् ?
(३९) नेपालको राजनीतिक, आर्थिक, शैक्षिक, सांस्कृतिक, सामाजिक पुनर्जागरणका लागि केके योजना छन् ?
(४०) तपाईंको पार्टीको समृद्ध , खुसी र सुखी नेपाल बनाउने योजनाहरु केके छन् ?

शब्दका जालझेल, सिद्धान्त हीन गठबन्धन र सत्ताको निम्ति गरिने तिकडमलाई तोड्ने क्षमता सर्वसाधारण मतदाता र कार्यकर्तामा हुन्छ । तपाईं हामीले प्रश्न नसोधेको कारण आज हामीमाथि शासन गर्ने छाडा साँढे झैं भएका छन् । अब पनि प्रश्न नगर्ने हो भने समय घर्किएर मुलुक नै रसातलमा पुग्ने अवस्था आइसकेको छ ।